ཡུ་ཨེཛ་གིས་ ཨེ་ཤི་ཡའི་ མཐུན་འབྲེལ་རྒྱལ་ཁབ་ཚུ་ལུ་ སྲུང་སྐྱོབ་ཡར་དྲག་གཏང་དགོ་པའི་ནན་སྐུལ།

སི་ཨེན་ཨེན།
སྤྱི་ཟླ་ ༥ པའི་ཚེས་ ༣༡ ལུ་ ཡུ་ཨེཛ་གི་ སྲུང་སྐྱོབ་དྲུང་ཆེན་ པེ་ཊེ་ཧེག་སེཐ་གིས་ ཨེ་ཤི་ཡ་དང་ པེ་སི་ཕིག་ ལུང་ཕྱོགས་དང་ འཛམ་གླིང་རྒྱལ་ཁབ་ག་ར་ལུ་ ཉེན་བརྡ་འབད་བའི་ནང་གསལ་ རྒྱ་ནག་གིས་ ཏ་ཡེ་ཝཱན་གྱི་ རྒྱབ་འགལ་ལུ་ འཆར་གཞི་བརྩམས་མི་ཚུ་ ཉེན་ཁ་ཅན་སྦེ་ཡོདཔ་ལས་ ཡུ་ཨེཛ་གི་ མཐུན་འབྲེལ་དང་ མཉམ་འབྲེལ་རྒྱལ་ཁབ་ཚུ་གིས་ རང་སོའི་སྲུང་སྐྱོབ་ཚུ་ ཡར་དྲག་གཏང་དགོ་པའི་ ནན་སྐུལ་འབད་དགོཔ་སྦེ་ནུག།
དེ་ཡང་ སྲུང་སྐྱོབ་དྲུང་ཆེན་གྱིས་ སིངྒ་པོར་ལུ་ཡོད་མི་ ཨེ་ཤི་ཡའི་ སྲུང་སྐྱོབ་གྲོས་གནས་ ཤང་རི་ལ་ལུ་ གསལ་བཤད་འབད་མིའི་ནང་ རྒྱ་ནག་གིས་ ཉེན་བརྡ་འབད་མི་ཚུ་ ངོ་མ་ལུ་ འགྱུར་སྲིད་ནི་མས་ཟེར་ཨིན་པས།
རྒྱ་ནག་གིས་ ཏ་ཡེ་ཝཱན་གྱི་ རྒྱབ་འགལ་ལུ་ དྲག་དམག་ལག་ལེན་གྱི་དོན་ལས་ ཉིན་བསྟར་བཞིན་དུ་ དམང་སྦྱོང་འབད་དེ་ ཨིན་ཌོ་པེ་སི་ཕིག་ ལུང་ཕྱོགས་ནང་ དབང་ཆ་འདྲ་མཉམ་དེ་ དྲག་པོའི་སྒོ་ལས་ སྒྱུར་བཅོས་གཏང་ནི་ལུ་ གྲ་སྒྲིག་འབད་དོ་ཡོདཔ་སྦེ་བཤད་ནུག།
ཁོ་གིས་འབད་བ་ཅིན་ རྒྱ་ནག་གི་སྲིད་འཛིན་ ཛི་ཇིན་པིང་གིས་ དྲག་པོའི་དམག་སྡེ་ལུ་ སྤྱི་ལོ་ ༢༠༢༧ ལོར་ ཏ་ཡེ་ཝཱན་ རྒྱལ་ཁབ་ནང་ བཙན་འཛུལ་འབད་དགོ་པའི་ བཀོད་རྒྱ་ཡང་ བཏང་ཡོདཔ་སྦེ་ཨིན་པས།
དེ་བཟུམ་མའི་ བཀོད་རྒྱ་བཏང་མི་དེ་ཡང་ མི་རློབས་ས་ཡ་ ༢༣ དེ་ཅིག་ཡོད་མི་ མཚོ་གླིང་ཏ་ཡེ་ཝཱན་དེ་ རྒྱ་ནག་གི་ གཞུང་སྐྱོང་འོག་ལུ་མེད་རུང་ རྒྱ་ནག་གི་ ཁོངས་སུ་བསྡུཝ་སྦེ་ བརྩི་དོ་ཡོདཔ་སྦེ་བཤད་ནུག།
སྲུང་སྐྱོབ་དྲུང་ཆེན་གྱིས་ ཨེ་ཤི་ཡའི་ སྲུང་སྐྱོབ་གྲོས་གནས་ནང་ ཡུ་ཨེཛ་གི་སྲིད་འཛིན་ ཌོ་ནཱལ་ཊཱམ་གྱིས་ ཏ་ཡེ་ཝཱན་དེ་ རྒྱ་ནག་གི་འོག་ལུ་ ཚུད་མ་བཅུག་པར་བཞག་ནི་ལུ་ ཁས་ལེན་གྲུབ་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།