ཡུ་ཨེཛ་གིས་ ཡེ་མེན་ལུ་ ས་སྣུམ་བཀྲམ་སྤེལ་གྱི་ ས་ཁོངས་ཅིག་ནང་ གནོད་འཚུབ་བཀལཝ་ད་ མི་གྲངས་ ༥༨ དེ་ཅིག་ལུ་ ཤི་རྐྱེན་དང་ ༡༢༦ དེ་ཅིག་ལུ་ རྨ་སྐྱོན་བྱུང་ཡོདཔ།

བི་བི་སི།
སྤྱི་ཟླ་ ༤ པའི་ཚེས་ ༡༨ ལུ་ ཡུ་ཨེཛ་དམག་སྡེ་གིས་ བཤད་དོ་བཟུམ་འབད་བ་ཅིན་ ཡུ་ཨེཛ་གི་ དམག་མི་ཚུ་གིས་ ཡེ་མེན་ལུ་ འཕྲལ་ཁམས་ཅིག་ཁར་ ཧའུ་ཐི་ངོ་ལོགཔ་ཚུ་དང་གཅིག་ཁར་ དམག་རྐྱབ་པའི་སྐབས་ལུ་ ས་སྣུམ་བཀྲམ་སྤེལ་གྱི་ ས་ཁོངས་ཅིག་ མེདཔ་བཏང་ཡི་ཟེར་ཨིན་པས།
དེ་ཡང་ རཛ་ཨི་སའི་ རེཌ་སི་ཟེར་མི་ རྒྱ་མཚོའི་གྲུ་ཚུགས་ཁ་ཐུག་ལུ་ གནོད་འཚུབ་བཀལ་དགོ་པའི་ དམིགས་ཡུལ་གཙོ་བོ་ར་ ཨི་རཱན་གྱིས་ རྒྱབ་སྐྱོར་འབད་མི་ ལས་འགུལ་གྱི་ མཁོ་ཆས་དང་ མ་དངུལ་ཚུ་ བཀག་ཆ་འབད་ཐབས་ལུ་ཨིནམ་སྦེ་བཤད་ནུག།
ཧུ་ཐི་ཚུ་གིས་ སླབ་དོ་བཟུམ་འབད་བ་ཅིན་ སྤྱི་ཟླ་ ༤ པའི་ཚེས་ ༡༧ ལུ་ ཡུ་ཨེཛ་གི་ དམག་སྡེ་གིས་ གནོད་འཚུབ་བཀལ་མིའི་ནང་ མི་གྲངས་ ༥༨ དེ་ཅིག་ལུ་ ཤི་རྐྱེན་དང་ ༡༢༦ དེ་ཅིག་ལུ་ རྨ་སྐྱོན་བྱུང་ཡི་ཟེར་ཨིན་པས།
ཡུ་ཨེཛ་གི་ དམག་མི་ཚུ་གིས་ ཟླཝ་ ༡ གི་ཧེ་མར་ ཧའུ་ཐི་ཚུ་དང་གཅིག་ཁར་ དམག་རྐྱབ་ནིའི་ལཱ་ཚུ་ ཡར་སེང་འབད་བའི་ཤུལ་ལས་ གནོད་འཚུབ་བཀལ་ཡོདཔ་ད་ ཨིན་རུང་ ཡུ་ཨེཛ་གི་ འགོ་དཔོན་ཚུ་གིས་ ཤི་རྐྱེན་བྱུང་མིའི་སྐོར་ལས་ བརྡ་དོན་ཁ་གསལ་ཅིག་ བཤད་མ་བཏུབ་སྦེ་བཀོད་ནུག།
སྤྱི་ལོ་ ༢༠༢༣ སྤྱི་ཟླ་ ༡༠ པའི་ནང་ ཨིཛ་རེལ་དང་ ག་ཟའི་བར་ན་ དམག་འཁྲུག་འགོ་བཙུགས་པའི་ཤུལ་ལས་ ཨི་རཱན་གྱིས་ རྒྱབ་སྐྱོར་འབད་མི་ ཧའུ་ཐི་ངོ་རྒོལ་བ་ཚུ་གིས་ རེཌ་སི་རྒྱ་མཚོ་དང་ ཨེ་ཌེན་རྒྱ་མཚོའི་ ཚོང་འབྲེལ་གྲུ་ཚུ་ལུ་ གནོདཔ་བཀལ་ནི་ འགོ་བཙུགས་ཡོདཔ་ཨིན་པས།
གནད་དོན་དེ་ལུ་བརྟེན་ཏེ་ འཛམ་གླིང་ནང་ ཚོང་ལམ་གཙོ་བོ་ཅིག་ཨིན་མི་ རེཌ་སི་རྒྱ་མཚོ་དེ་ ཚོང་འབྲེལ་འཐབ་མི་ མཚོ་གྲུ་བརྒྱ་ཆ་ ༡༥ གིས་མ་གཏོགས་ མཚོ་གྲུའི་ལས་སྡེ་ ལེ་ཤ་ཅིག་གིས་ར་ བཀག་ཆ་འབད་དེ་ ལག་ལེན་འཐབ་མ་བཏུབ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།