འཛམ་གླིང་ནང་གི་ གཙུག་ལག་སློབ་སྡེ་ཚུ་ནང་ ཕྱིའི་རྒྱལ་ཁབ་ཁག་གི་ སློབ་ཕྲུག་ཚུ་ལུ་ འཛུལ་ཞུགས་ཀྱི་ནན་སྐུལ།

རོའི་ཊརཛ།
སྤྱི་ཟླ་ ༥ པའི་ཚེས་ ༣༠ ལུ་ ཡུ་ཨེཛ་གི་སྲིད་འཛིན་ ཌོ་ནཱལ་ཊཱམ་གྱིས་ ཁོང་གི་གཙུག་ལག་སློབ་སྡེ་ཚུ་ནང་ ཕྱི་རྒྱལ་གྱི་ སློབ་ཕྲུག་ཚུ་ བཙུགས་ནི་མེདཔ་ བཟོ་ནིའི་དོན་ལས་ ཡུ་ཨེཛ་གི་ གཞུང་ཚབ་ཡིག་ཚང་ཚུ་ལུ་ རྒྱལ་ཁབ་ནེ་ནང་ འཛུལ་ཞུགས་ཀྱི་ ཆོག་ཐམ་ཚུ་ མཚམས་འཇོག་འབད་དགོ་པའི་ བཀའ་རྒྱ་གནང་ནུག།
དེ་འབདཝ་ལས་ འཛམ་གླིང་མཐའ་དབུས་ཀྱི་ གཙུག་ལག་སློབ་སྡེ་ཚུ་གིས་ ཕྱིའི་རྒྱལ་ཁབ་ཁག་གི་ སློབ་ཕྲུག་ཚུ་ ཁོང་གི་གཙུག་ལག་སློབ་སྡེ་ཚུ་ནང་ འོང་དགོ་པའི་ རྒྱུད་སྐུལ་འབད་དོ་ཡོདཔ་ཨིན་པས།
རྒྱ་པཱན་གྱི་ གཙུག་ལག་སློབ་སྡེ་ཨང་དང་པ་ ཨོ་ས་ཀ་གཙུག་ལག་སློབ་སྡེ་གིས་ སློབ་སྟོན་གྱི་ གླ་ཡོན་ཡངས་ཆག་ གཏང་ནི་ཨིན་པའི་གུ་ ཞིབ་འཚོལ་གྱི་ གནང་སྦྱིན་དང་ སློབ་ཕྲུག་ཚུ་ལུ་ འགྲུལ་བསྐྱོད་ཀྱི་ གྲོགས་རམ་ཚུ་ཡང་འབད་ནི་ཟེར་ བཤད་དོ་ཡོདཔ་ད་ དེ་བཟུམ་སྦེ་ ཀི་ཡོ་ཊོ་གཙུག་ལག་སློབ་སྡེ་གིས་ཡང་ ལས་འཆར་ཚུ་ ཤོ་མཚུངས་སྦེ་ར་ བརྩམ་དོ་ཡོདཔ་སྦེ་བཀོད་ནུག།
ཧོང་ཀོང་ལུ་འབད་བ་ཅིན་ ཁོང་གི་གཙུག་ལག་སློབ་སྡེ་ཚུ་ནང་ ད་རེས་ ཡུ་ཨེཛ་ལུ་སྡོད་མི་ སློབ་ཕྲུག་ཚུ་ གནས་སོར་འོང་ནི་ལུ་ སེམས་ཤུགས་བསྐྱེད་བཅུག་ཐབས་འབད་དགོ་པའི་ བཀོད་རྒྱ་བཏང་ཡོདཔ་ད་ རྒྱ་ནག་གི་ ཟི་ཇི་ཨའོ་ཏོང་ གཙུག་ལག་སློབ་སྡེ་གིས་ཡང་ སློབ་ཕྲུག་ཚུ་ སློབ་སྡེ་དེ་ནང་ འོང་དགོ་པའི་ ནན་སྐུལ་འབད་དོ་ཡོདཔ་ཨིན་པས།
ཡུ་ཨེཛ་གཞུང་གིས་ ཞིབ་འཚོལ་ཚུ་གི་ མ་དངུལ་ཚུ་ བཏོག་བཞག་ཡོདཔ་མ་ཚད་ སྤྱིར་ཕྱི་རྒྱལ་གྱི་ སློབ་ཕྲུག་ཚུ་དང་ ལྷག་པར་དུ་ རྒྱ་ནག་ལས་ འོང་མི་ཚུ་ལུ་ ཆོག་ཐམ་བྱིན་ནི་མེདཔ་ བཟོ་ཡོདཔ་ད་ གནས་ཚད་མཐོ་ཤོས་ཡོད་མི་ སློབ་གྲྭ་ཚུ་ལུ་ ཁྲལ་ཚུ་ཡང་ ཡར་སེང་འབད་ནི་གི་ འཆར་གཞི་ཡོདཔ་སྦེ་བཀོད་ནུག།
རྒྱ་པཱན་གྱིས་ ད་རེས་ཡོད་མི་ ཕྱི་ཁའི་སློབ་ཕྲུག་ ༣༣༧,༠༠༠ དེ་ཅིག་ཡོད་མི་དེ་ ༤༠༠,༠༠༠ ལྷགཔ་ཅིག་ལུ་ ཡར་སེང་འབད་ནི་གི་ དམིགས་གཏད་བསྐྱེདཔ་ཨིན་པས་ཟེར་ བཀོད་འདུག་པའི་གནས་ཚུལ།