འབྲུག་དང་ ཨཱཛ་ཊྲེ་ལི་ཡའི་བར་ན་ མཁའ་འགྲུལ་ཞབས་ཏོག་གི་དོན་ལུ་ གོ་དོན་ཆིངས་ཡིག།

པདྨ་དབང་འདུས།
སྤྱི་ཟླ་ ༡༡ པའི་ཚེས་ ༡༢ ལུ་ འབྲུག་གཞུང་དང་ ཨཱཛ་ཊྲེ་ལི་ཡའི་ གཞུང་གི་བར་ན་ ལོ་བསྟར་ཟུང་ཕྱོགས་གྲོས་བསྟུན་དེ་ སྤྱི་ཟླ་ ༡༡ པའི་ཚེས་ ༡༢ ལུ་ ཨཱཛ་ཊྲེ་ལི་ཡའི་རྒྱལ་ས་ ཀེན་བེ་ར་ལུ་སྦེ་ འགོ་འདྲེན་འཐབ་ནུག།
གྲོས་བསྟུན་དེ་ནང་ འབྲུག་གི་སྡེ་ཚན་དེ་ ཕྱི་འབྲེལ་ལྷན་ཁག་གི་དྲུང་ཆེན་ པདྨ་ལེགས་གྲུབ་རྡོ་རྗེ་གིས་ འགོ་ཁྲིད་འབད་ཡོདཔ་ད་ ཨཱཛ་ཊྲེ་ལི་ཡའི་སྡེ་ཚན་དེ་ ཨཱཛ་ཊྲེ་ལི་ཡའི་ ཕྱི་འབྲེལ་དང་ ཚོང་འབྲེལ་ལས་ཁུངས་འོག་གི་ ལྷོ་དང་ཤར་ལྷོ་ཨེ་ཤི་ཡའི་ དྲུང་ཆེན་འོགམ་ ཨམ་མི་ཤེལ་ཅཱན་གྱིས་ འགོ་ཁྲིད་འབད་ཡོདཔ་ཨིན་པས།
དེ་བསྒང་ ཕྱོགས་གཉིས་ཆ་རའི་ ཁ་ཐུག་ལས་ འབྲུག་དང་ ཨཱཛ་ཊྲེ་ལི་ཡའི་ ཟུང་ཕྱོགས་མཐུན་འབྲེལ་དེ་ ཆེ་མཐོའི་འགོ་དཔོན་ཚུ་གི་ ཕན་ཚུན་བརྗེ་སོར་དང་ མི་སེར་ཚུ་གི་བར་ན་ མཐུན་ལམ་ཚུ་ ཡར་སེང་ཐོག་ལས་ གོང་འཕེལ་སོང་ཡོད་མི་ལུ་ ངལ་རངས་ཡོད་ལུགས་ཚུ་ བཤད་ཡོདཔ་མ་ཚད་ ད་ལས་ཕར་ཡང་ མཐའ་དོན་གཅིག་པའི་ གནད་དོན་དང་ མནོ་དོན་གཅིག་པའི་ བརྩི་མཐོང་ཚུ་ལུ་ གཞི་བརྟེན་ཏེ་ ཟུང་ཕྱོགས་མཐུན་འབྲེལ་དེ་ བཙན་ཐབས་འབད་ནི་ལུ་ ཁས་ལེན་བསྐྱར་གསོ་འབད་ནུག།
གྲོས་བསྟུན་དེ་ནང་ ད་ཡོད་མཉམ་འབྲེལ་ཚུ་གི་ ཡར་འཕེལ་བསྐྱར་ཞིབ་འབད་ནི་དང་ ད་ལས་ཕར་ མཉམ་འབྲེལ་གྱི་ གཙོ་རིམ་ཚུ་ ངོས་འཛིན་འབད་ནི་ དེ་ལས་ སྤྱི་ལོ་ ༢༠༢༧ ལུ་ འབྲུག་དང་ ཨཱཛ་ཊྲེ་ལི་ཡའི་བར་ན་ དོན་གཅོད་མཐུན་ལམ་ གཞི་བཙུགས་མཛད་དེ་ མི་ལོ་ ༢༥ འཁོར་བའི་ དུས་དྲན་བརྩི་སྲུང་གི་དོན་ལུ་ ལས་སྣ་ཚུ་གི་སྐོར་ལས་ གསུང་གྲོས་ཚུ་གནང་ནི་གི་ གོ་སྐབས་ཡང་ ཐོབ་ཡོདཔ་ཨིན་པས།
དེ་ཁ་ལུ་ ཚོང་འབྲེལ་དང་ མ་རྩ་གཞི་བཙུགས་ ཤེས་རིག་དང་ རིག་རྩལ་གོང་འཕེལ་ དེ་ལས་ གོང་འཕེལ་མཉམ་འབྲེལ་དང་ དཔལ་འབྱོར་མཉམ་འབྲེལ་ མི་སེར་དང་ མི་སེར་གྱི་བར་ན་བརྗེ་སོར་ རྒྱལ་སྤྱི་མཉམ་འབྲེལ་ཚུ་དང་སྦྲགས་ཏེ་ དཔལ་འབྱོར་མཉམ་འབྲེལ་གྱི་སྐོར་ལས་ཡང་ གསུང་གྲོས་ཚུ་བྱུང་ནུག།
དེ་ལས་ འབྲུག་གཞུང་དང་ ཨཱཛ་ཊྲེ་ལི་ཡ་ གཞུང་གི་བར་ན་ མཁའ་འགྲུལ་ཞབས་ཏོག་དང་འབྲེལ་བའི་ གོ་དོན་ཆིངས་ཡིག་ཅིག་གུ་ མིང་རྟགས་བཀོད་ཡོདཔ་ད་ མིང་རྟགས་ཚུ་ཡང་ འབྲུག་གི་ཧོངས་ལས་ སྐུ་ཚབ་པདྨ་མཚོ་མོ་དང་ ཨཱཛ་ཊྲེ་ལི་ཡའི་ གཞུང་གི་ཧོངས་ལས་ རྒྱལ་སྤྱིའི་མཁའ་འགྲུལ་དང་ གཞི་རྟེན་མཁོ་ཆས་དང་སྐྱེལ་འདྲེན་ ལུང་ཕྱོགས་གོང་འཕེལ་ བརྒྱུད་འགྲུལ་ རྩེད་རིགས་དང་ ལག་རྩལ་ལས་ཁུངས་ཀྱི་ དྲུང་ཆེན་འོགམ་ ཇིམ་འུལ་ཕི་གིས་ འབྲུག་གི་ཕྱི་འབྲེལ་དྲུང་ཆེན་ པདྨ་ལེགས་གྲུབ་རྡོ་རྗེ་གི་ སྐུ་མདུན་ལུ་སྦེ་ བཀོད་ཡོདཔ་ཨིན་པས།
གོ་དོན་ཆིངས་ཡིག་དེ་གིས་ འབྲུག་དང་ ཨཱཛ་ཊྲེ་ལི་ཡའི་བར་ན་ མཁའ་འགྲུལ་ཞབས་ཏོག་ནང་ མཉམ་འབྲེལ་གྱི་དོན་ལས་ སྒྲིག་བཀོད་གཞི་བཙུགས་འབད་ཡོདཔ་ད་ རྒྱལ་ཁབ་ ༢ ཀྱི་བར་ན་ འགྲུལ་བསྐྱོད་དང་ བལྟ་བཤལ་ ཚོང་འབྲེལ་ མི་སེར་ཚུ་གི་བར་ན་ བརྗེ་སོར་ཚུ་གི་ གོ་སྐབས་ཚུ་གི་སྒོ་ལས་ མཐུད་སྦྲེལ་ཡར་སེང་གི་དོན་ལུ་ མཐུན་རྐྱེན་སྦྱར་ནི་གི་ མནོ་དོན་གཅིག་མཚུངས་ཀྱི་ ཁས་ལེན་ཡོད་པའི་ བརྡ་མཚོན་སྟོན་ནུག།
ཨཱཛ་ཊྲེ་ལ་ཡ་ལུ་ ཕྱི་འབྲེལ་དྲུང་ཆེན་གྱིས་ འབྲུག་གི་གཞུང་ཚབ་ཡིག་ཚང་གི་ དོན་གཅོདཔ་ཚུ་དང་ འབྲུག་མི་ཚོགས་པའི་ ངོ་ཚབ་ཚུ་དང་ཡང་ ཕྱད་ཡོད་པའི་གནས་ཚུལ།