འབྲུག་གི་རྒྱལ་ཡོངས་ཚོགས་སྡེའི་ ཚོགས་ཐེངས་ ༣༥ པའི་ གྲོས་གཞི་བཅུད་བསྡུས།

ཤིང་སྦྲུལ་ཟླཝ་ ༣ པའི་ཚེས་ ༢༦ སྤྱི་ཟླ་ ༥ པའི་ཚེས་ ༢༣ ལུ་ གཟའ་སྐར་འཕྲོན་སྦྱོར་ཚུ་ ཕུན་སུམ་ཚོགས་པའི་ཉིན་མར་ འབྲུག་གི་རྒྱལ་ཡོངས་ཚོགས་སྡེའི་ ཚོགས་ཐེངས་ ༣༥ པ་འདི་ བཞུགས་གྲལ་ཕུན་སུམ་ཚོགས་པ་དང་བཅས་པའི་སྒོ་ལས་ འགོ་འབྱེད་རྟེན་འབྲེལ་ མཛད་གནང་ཡི།
དེ་བསྒང་ ཚོགས་ཐེངས་དེ་ནང་ སྲིད་བྱུས་བསྐྱར་ཞིབ་སྙན་ཞུ་དང་ བཅའ་ཁྲིམས་འཕྲི་སྣོན་ཚུ་ལུ་ གསུང་གྲོས་གནང་ཐོག་ལས་ ཆ་འཇོག་མཛད་གནང་ནི་ཨིན་པའི་ཁར་ ཚོགས་ཐེངས་ ༣༤ པའི་ གྲོས་ཆོད་དང་ལེན་སྙན་ཞུ་དང་། འབྲུག་རྒྱལ་ཁབ་ནང་ ལྟ་བཤལ་གནས་སྟངས་གུ་ བསྐྱར་ཞིབ་སྙན་ཞུ། གྲོང་གསེབ་ཚེ་སྲོག་ཉེན་བཅོལ་ལས་འཆར་གུ་ བསྐྱར་ཞིབ་སྙན་ཞུ། ནགས་ཚལ་ལས་སྡེ་གིས་ ནང་འཁོད་ཐོན་སྐྱེད་ཡོངས་འབོར་ལུ་ ཕན་འདེབས་ཀྱི་ བསྐྱར་ཞིབ་སྙན་ཞུ་ཚུ་གུ་ གསུང་གྲོས་གནང་ནི་ཨིན་པས།
དེ་མ་ཚད་ འབྲུག་གི་ཉེས་འགལ་ཁྲིམས་དེབ་ (འཕྲི་སྣོན) དཔྱད་ཡིག་ ༢༠༢༥ ཅན་མའི་ གནས་སྐབས་སྙན་ཞུ་དང་། ན་གཞོན་དང་ སྨྱོ་རྫས་ལོག་སྤྱོད་ཀྱི་ བསྐྱར་ཞིབ་སྙན་ཞུ། འབྲུག་གི་ནང་ཁྲལ་ ཁྲལ་གྱི་དཔྱད་ཡིག་ ༢༠༢༥ ཅན་མ། འབྲུག་གི་ཅ་ཆས་དང་ ཞབས་ཏོག་ཁྲལ་གྱི་ (འཕྲི་སྣོན་) དཔྱད་ཡིག་ ༢༠༢༥ ཅན་མ། འབྲུག་གི་འོང་འབབ་ཁྲལ་གྱི་ དཔྱད་ཡིག་ ༢༠༢༥ ཅན་མ་། རྩིས་ལོ་ ༢༠༢༥-༢༠༢༦ གི་ འཆར་དངུལ་དཔྱ་བགོའི་དཔྱད་ཡིག་དང་ དེ་ལས་ རྩིས་ལོ་ ༢༠༢༤-༢༠༢༥ གི་ ལྷན་ཐབས་འཆར་དངུལ་དཔྱ་བགོའི་ དཔྱད་ཡིག་ཚུ་ལུ་ཡང་ གསུང་གྲོས་གནང་ནི་ཨིན་པས།
རྒྱལ་ཡོངས་ཚོགས་སྡེའི་ ཚོགས་ཐེངས་ ༣༥ པ་དེ་ སྤྱི་ཟླ་ ༧ པའི་ཚེས་ ༢ ལུ་ འགྲོལ་གནང་ནི་གི་ ལས་རིམ་ཡོདཔ་ཨིན་པའི་གནས་ཚུལ།