སྤྱི་ཟླ་ ༨ པའི་ཚེས་ ༦ ལུ་ མི་དབང་མངའ་བདག་རིན་པོ་ཆེ་དང་ མི་དབང་རྒྱལ་བཙུན་མཆོག་གིས་ དབུ་གཙོས་པའི་ མི་དབང་སྐུ་འཁོར་ལྷན་རྒྱས་ཀྱིས་ རྒྱལ་འཛིན་ཐགས་རིགས་སྤེལ་ཁང་ནང་ མི་དབང་འབྲུག་རྒྱལ་བཞི་པ་མཆོག་གི་ འཁྲུངས་སྐར་དུས་སྟོན་ ཐེངས་ ༧༠ པའི་དོན་ལས་ ཆེད་དུ་སྨོན་པའི་ དམིགས་བསལ་གྱི་ འགྲེམ་སྟོན་ཚུ་ལུ་ གཟིགས་ཞིབ་གནང་ནུག།
དེ་ཡང་ མངོན་གཟིགས་ཅན་གྱི་རྒྱལ་པོ་ འབྲུག་རྒྱལ་བཞི་མཆོག་གི་ ཡུན་གནས་མཛད་ཤུལ་ལུ་ གུས་བཏུད་ཟེར་བའི་ འགྲེམ་སྟོན་དེ་ སྤྱི་ལོ་ ༢༠༢༦ སྤྱི་ཟླ་ ༦ པའི་ཚེས་ ༢ ལུ་ མི་དབང་རྒྱལ་སྲས་ འཇིགས་མེད་རྣམ་རྒྱལ་དབང་ཕྱུག་མཆོག་གིས་ འགོ་འབྱེད་མཛད་གནང་ཡོདཔ་ད་ རྒྱལ་འཛིན་ཐགས་རིག་སྤེལ་ཁང་དང་ ལམ་སྲོལ་དང་ རྫོང་ཁ་གོང་འཕེལ་ལས་ཁུངས་འོག་གི་ འགྲེམ་སྟོན་ལས་ཚན་ ༢ མཉམ་འབྲེལ་ཐོག་ལས་ བདག་གཉེར་ཐོག་ལུ་ཡོདཔ་ཨིན་པས།
དེ་དང་གཅིག་ཁར་ མི་དབང་སྐུ་འཁོར་ལྷན་རྒྱས་ཀྱིས་ རྒྱལ་འཛིན་ཐགས་རིག་སྤེལ་ཁང་ནང་ གཟིགས་སྟོན་གྱི་ཆེད་ལུ་ཡོད་པའི་ འབྲུག་གི་ཐགས་བཟོ་འགྲེམ་སྟོན་ལུ་ཡང་ གཟིགས་ཞིབ་གནང་ཡོད་པའི་གནས་ཚུལ།
