མ་ཡཱན་མར་གྱི་ དྲག་པོའི་སྲིད་གཞུང་ལུ་ ངོ་རྒོལ་འབད་མི་ཚུ་གིས་ རྒྱལ་ཁབ་བྱང་ཕྱོགས་ཀྱི་ས་ཁོངས་ དབང་ལུ་བསྡུ་ཡོདཔ།

ཨཱལ་ཇ་ཟི་ར།
མ་ཡན་མར་ རྒྱལ་ཁབ་ནང་ དྲག་པོའི་སྲིད་གཞུང་ལུ་ ངོ་རྒོལ་འབད་མི་ གཡིབ་དམག་སྡེ་ཚན་གྱིས་ ན་ཧིང་ སྤྱི་ཟླ་ ༡༠ པ་ལས་ཚུར་ དྲག་པོའི་སྲིད་གཞུང་ལུ་ གནོད་འཚེ་ལན་ཐེངས་ ༢ པ་ འགོ་འདྲེན་འཐབ་ཡོདཔ་ད་ གནོད་འཚེ་ཐེངས་དང་པའི་སྐབས་ལུ་ མངའ་སྡེ་ཤཱན་ཟེར་མིའི་ ཤར་ཁ་ཐུག་ལུ་ རྒྱ་ནག་དང་གཅིག་ཁར་ ས་མཚམས་སྦྱེལ་ཏེ་ཡོད་མི་ ཐབས་བྱུས་ཅན་གྱི་ ས་ཁོངས་ཚུ ཁོང་གི་དབང་ལུ་བསྡུ་ནུག།
ད་རེས་ ས་གནས་མཱ་ཌ་ལེ་དང་ ལ་ཤི་ཡོ་ཟེར་མིའི་བར་ན་ དྲག་པོའི་སྲིད་གཞུང་གིས་ བྱང་ཤར་ལུང་ཕྱོགས་ དམག་སྡེ་ལྟེ་བ་སྦེ་ ལག་ལེན་འཐབ་མི་ ས་ཆ་རྒྱ་ཞེང་ཀི་ལོ་མི་ཊར་ ༢༨༠ འབད་མི་དེ་ གཡིབ་དམག་སྡེ་ཚན་གྱིས་ དབང་ལུ་བསྡུ་ནིའི་དོན་ལས་ བརྩོན་ཤུགས་བསྐྱེདཔ་ཨིན་པས།
དེ་ཡང་ ཏཱང་རྒྱལ་ཡོངས་ ལི་བེ་རེ་ཤཱན་དམག་སྡེ་གིས་ འགོ་ཁྲིད་ཐོག་ལུ་ མ་ཡཱན་མར་ རྒྱལ་ཡོངས་དམངས་གཙོའི་ གཅིག་སྒྲིལ་དམག་སྡེ་དང་ མཱན་ཌ་ལེ་ མི་མང་སྲུང་སྐྱོབ་དམག་སྡེ་གིས་ མོ་གོག་དང་ བྱང་ཤཱན་ ཀི་ཡཱག་མེ་ དེ་ལས་ ནཱང་ཀི་ཡོ་ ས་ཁོངས་ཚུ་ དབང་ལུ་བསྡུ་ནུག།
སྤྱི་ཟླ་ ༧ པའི་ཚེས་ ༢༥ ལུ་ མ་ཡཱན་མར་ རྒྱལ་ཡོངས་དམངས་གཙོའི་ གཅིག་སྒྲིལ་དམག་སྡེ་གིས་ ལ་ཤི་ཡོ་ཁྲོམ་དེ་ དབང་ལུ་བསྡུ་ཡོད་རུང་ དོ་གནོན་ ཧྲིལ་བུར་འབད་མ་ཚུགས་པར་ ད་རེས་ཡང་ ཕྱད་མདའ་རྐྱབ་དོ་ཡོདཔ་ཨིན་པས།
ཏ་ཡེ་སློབ་ཕྲུག་སྡེ་ཚོགས་ཀྱིས་ བསྡུ་སྒྲིགས་འབད་མི་ འགྲོ་བ་མིའི་ཐོབ་དབང་དང་འབྲེལ་བའི་ མི་སྡེའི་གནད་སྡུད་དང་འཁྲིལཝ་ད་ བར་སྐབས་ཅིག་ཁར་ བྱང་ཤཱན་མངའ་སྡེ་དང་ མཱན་ཌ་ལེ་ ལུང་ཕྱོགས་ནང་ ཕྱད་མདའ་ལང་པའི་ཤུལ་ལས་ མི་གྲངས་ ༡༠༠,༠༠༠ དེ་ཅིག་ལུ་ སྡོད་ས་མེདཔ་ བཟོ་བའི་ཁར་ ཞི་བའི་མི་སེར་ ༡༤༡ དེ་ཅིག་ལུ་ ཤི་རྐྱེན་དང་ ༡༠༠ དེ་ཅིག་ལུ་ཡང་ རྨ་སྐྱོན་བྱུང་ནུག་ཟེར་ བཀོད་འདུག་པའི་གནཤ་ཚུལ།