རྒྱབ་ཁུངས།
༆ ཧེ་མར་ བོད་ལུ་ ཆོས་ཀྱི་རྒྱལཔོ་ ཁྲི་སྲོང་ལྡེའུ་བཙན་གྱིས་ བསམ་ཡས་གཙུག་ལག་ཁང་ བཞེངས་གནང་པའི་སྐབས་ལུ་ ཉིན་མར་ མི་གིས་བཞེངས་མི་ཚུ་ག་ར་ ནུབ་མོར་ ལྷ་འདྲེ་ཚུ་གིས་ བརྡལ་བཏང་སྟེ་ བཞེངས་མ་བཅུགཔ་ལས། ཨོ་རྒྱན་གུ་རུ་རིན་པོ་ཆེ་གིས་ རྒྱགས་བརྔན་ལྷ་བསང་ཟེར་མི་ བརྩམས་གནང་སྟེ་ ལྷ་བསང་བཏང་གནང་པ་ལུ་བརྟེན་ཏེ། ལྷ་འདྲེ་ཚུ་ སེམས་དགའ་བའི་སྟབས་ཀྱིས་ ཞེ་སྡང་དང་ ང་རྒྱལ་ལ་སོགས་པ་ ཞི་ཐོག་ལས་ བསམ་ཡས་ཀྱི་ གཙུག་ལག་ཁང་དེ་ ཉིན་མར་ མི་གིས་ བཞེངས་མི་ལས་ལྷག་སྟེ་ ནུབ་མོར་ ལྷ་འདྲེ་ཚུ་གིས་བཞེངས་པའི་ ལོ་རྒྱུས་ཨིན་པས།
བསང་གཏང་ཡུལ།
༆ དེ་ཡང་ ཆོས་སྐྱོང་སྲུང་མ་དང་ ཡུལ་ལྷ་གཞི་བདག་ཚུ་ལུ་ སྐྱེས་གྲིབ་དང་ ཤི་གྲིབ་ལ་སོགས་པ་ཚུ་ གཙང་ཏོག་ཏོ་ བཟོ་ཐབས་ལུ་ཨིནམ་ད། དེ་སྦེ་ བསང་མཆོད་ཕུལ་མ་ཚུགས་པ་ཅིན་ ཆོས་སྐྱོང་སྲུང་མ་དང་ ཡུལ་ལྷ་གཞི་བདག་ཚུ་ཁྲོས་ཏེ་ ནད་ཡམས་ མུ་གེ་དང་ དམག་འཁྲུག་ལ་སོགས་པ་ཚུ་འབྱུང་སྟེ་ ང་བཅས་ལུ་ དགའ་སྐྱིད་ཟེར་མི་ རྩ་ལས་རང་ མི་འབྱུང་ནི་ཨིན་པས།
གཏང་ཐངས།
༆ སྤྱིར་བཏང་ལུ་ བསང་ག་ཏེ་གཏང་རུང་ མ་བཏུབ་ཅིག་མེད་རུང་ རབ་འབྱུང་པ་ཅིན་ རི་མཐོ་སར་ གཏང་དགོཔ་ཨིན་པས། དེ་ཡང་ འབུབ་མེད་སར་ བསང་སྟེགས་ཟེར་ རྩིགཔ་རྐྱབ་སྟེ་ བཟོ་ནི་དང་ ཡང་ཅིན་ ལྷ་ང་རྡོ་ལེབ་གུ་བཞག་སྟེ་ ལྷ་ངའི་ནང་འབད་ གཏང་དགོཔ་ཨིན་པས། དེ་སྦེ་ གཏང་དགོ་པའི་ རྒྱུ་མཚན་དེ་ཡང་ ས་ཆ་གཙང་ཏོག་ཏོ་ཡོད་པའི་གུ་ རླུང་མ་ཡང་ གཙང་ཏོག་ཏོ་ཡོདཔ་ལས། བསང་མཆོད་ལུ་ དྲི་ངན་གྱིས་ མི་གོས་ནི་དང་། མཆོད་ཡུལ་ཚུ་ དབུ་འཕང་མཐོ་ནི། བསང་མཆོད་གཙང་མ་གིས་ ས་ཕྱོགས་ག་ཏེ་ཡང་ ཁྱབ་ཚུགསཔ་ལས་ ཆོས་སྐྱོང་སྲུང་མ་དང་ ཡུལ་ལྷ་གཞི་བདག་ཚུ་ ཐུགས་མཉེས་ཏེ་ དབང་ཐང་དང་ རླུང་རྟ་ཚུ་ དར་ཞིང་རྒྱས་ནི་གི་ ཁྱད་པར་ཡོདཔ་ཨིན་པས།
དེ་མ་ཚད་ བླམ་དང་ དཔོན་དེ་ཚུ་ བྱོན་པའི་སྐབས་ལུ་ བྱོན་ལམ་བདའ་སྟེ་ རང་ལུ་ཡོད་མི་ གྲིབ་དེ་ཚུ་ བསང་ཐབས་ལུ་དང་ གུས་བཏུད་ཞུ་བའི་ཚུལ་ལུ་ཡང་ བསང་གཏང་སྲོལ་ཡོདཔ་ཨིན།
རྒྱུ་མཚན།
༆ བསང་གཏང་དགོ་པའི་ རྒྱུ་མཚན་དེ་ཡང་ ཨོ་རྒྱན་མཚོ་སྐྱེས་རྡོ་རྗེ་གིས། རྟེན་འབྲེལ་ཟབ་མོའི་ཆོ་ག་འདིཿ དགོན་གནས་གཙུག་ལག་ཆོས་འཁོར་དངཿ བཟང་ཤིང་ཕྱེ་མར་གསུར་དུད་ལཿ བརྟེན་ནས་ཉམས་སུ་བླངས་པས་སེལཿ ཟེར་གསུངས་དོ་བཟུམ་སྦེ་ སྐྱེས་གྲིབ་དང་ ཤི་གྲིབ་ལ་སོགས་པ་ཚུ་ གཙང་ཏོག་ཏོ་ བཟོ་ཐབས་ལུ་དང་། བསང་གི་དུ་པ་གིས་ མི་ནད་དང་ ཕྱུགས་ནད་ མུ་གེ་ དམག་འཁྲུག་ལ་སོགས་པ་ཚུ་ བསལ་ཐབས་ལུ་ཨིན་པས།
བསང་ཤིང་།
༆ བསང་གི་དོན་ལས་ སྔོ་ཤིང་གི་རིགས་ཚུ་ ག་ནི་ཡང་ མ་བཏུབ་ཅིག་མེད་རུང་། རྩང་ཡོད་མི་དང་ ཨོམ་ཐོན་མི་ སྔོ་ཤིང་གི་རིགས་ཚུ་ བསང་ཤིང་སྦེ་ གཏང་མི་བཏུབ་ནི་ཨིན་པས། དེ་ཡང་ རྩང་ཡོད་མི་ སྔོ་ཤིང་དེ་ དྲག་ཤིང་དང་ ཨོམ་ཐོན་མི་ སྔོ་ཤིང་དེ་ དུག་ཤིང་འབད་ནི་དེ་གིས་ བསང་ཤིང་འབད་ གཏང་མ་བཏུབ་ཨིན་པས།
བསང་རྫས།
༆ ཨོ་རྒྱན་མཚོ་སྐྱེས་རྡོ་རྗེ་གིས། བསང་མཆོད་འདོད་ཡོན་སྤྲིན་ཕུང་ལཿ མེ་ཐབ་རྒྱ་ཆེ་སྤང་མཐོའི་ནངཿ བཟང་ཤིང་ཕྱེ་མར་འབྲུ་སྣ་བསྲེགཿ གཙང་མའི་ཆབ་ཀྱིས་རབ་བྲན་ནསཿ ཟེར་གསུངས་དོ་བཟུམ་སྦེ་ བསང་རྫས་ནང་ ཕྱེ་དང་ མར་ ཨོམ་ འབྲུ་སྣ་ དར་སྣ་ གོས་སྣ་ ཆང་ལ་སོགས་པ་ཚུ་ བླུགས་དགོཔ་ཨིན་པས།
བསང་རྫས་ནང་ ཕྱེ་དང་ མར་ ཨོམ་ འབྲུ་སྣ་ དར་སྣ་ གོས་སྣ་ ཆང་ལ་སོགས་པ་ཚུ་ བླུགས་དགོ་པའི་ རྒྱུ་མཚན་དེ་ཡང་ དཀོན་མཆོག་གསུམ་དང་ ཡུལ་ལྷ་གཞི་བདག་ལ་སོགས་པ་ཚུ་ལུ་ ཞལ་ཟས་རོ་བརྒྱ་དང་ བཏུང་བ་རྒྱ་མཚོ་གིས་ མཆོད་ནིའི་དོན་ལུ་ཨིན་པས།
ཆབ་སྦྲོན།
༆ བསང་རྫས་ཚུ་ མེ་ནང་བླུགས་ཚར་བའི་ཤུལ་ལུ་ ཆབ་སྦྲོན་དགོཔ་ཨིན་པས། དེ་ཡང་ དང་པར་དུ་ རང་གིས་མ་ཤེས་ མ་མཐོང་པར་འཛུལ་མི་ བཙོག་པའི་རིགས་ཚུ་འདག་སྟེ་ གཙང་མ་ཡེ་ཤེས་ཀྱི་ བདུད་རྩི་ལ་སོགས་པའི་ ངོ་བོ་ལུ་ འགྱུར་ནི་དང་། གཉིས་པ་ མཆོད་པའི་རྫས་ཚུ་ ཉུང་སུ་ཅིག་ལས་མེད་རུང་ མཆོད་རྫས་དེ་ཚུ་ རྒྱ་ཆེར་སྤེལ་ནི། གསུམ་པ་ མཆོད་རྫས་ཀྱི་རིགས་ཚུ་ལུ་ དཀོན་མཆོག་གསུམ་གྱིས་ བྱིན་གྱིས་བརླབས་ཏེ་ གནོད་བྱེད་འབྱུང་པོ་ མི་མ་ཡིན་དང་ དྲི་ཟ་ གདོན་བགེགས་ ཐེའུ་རང་ལ་སོགས་པ་ཚུ་གིས་ ལོངས་སྤྱོད་མ་ཚུགས་པའི་ དགོས་པ་ཡོདཔ་ཨིན་པས།
ཕན་ཡོན།
༆ དཀོན་མཆོག་གསུམ་དང་ ཆོས་སྐྱོང་སྲུང་མ་ ཡུལ་ལྷ་གཞི་བདག་ཚུ་ལུ་ བསང་མཆོད་ཕུལ་བའི་ ཐུགས་རྗེ་བྱིན་རླབས་ལུ་བརྟེན་ཏེ། འཇིག་རྟེན་གྱི་ཁམས་འདི་ནང་ ཆར་ཆུ་དུས་ལུ་འབབ་ ལོ་ཕྱུགས་རྟག་ཏུ་ལེགས་ཏེ་ ནད་ཡམས་མུ་གེ་དང་ དམག་འཁྲུག་ལ་སོགས་པའི་ མིང་ཙམ་ཡང་མེད་པར་ དགའ་སྐྱིད་ལུ་ ལོངས་སྤྱོད་ཚུགས་པའི་ ཕན་ཡོན་སྦོམ་ཡོདཔ་ཨིན་པས།
ཕན་ཡོན་གྱི་ལོ་རྒྱུས།
༆ དེ་ཡང་ སྔོན་གྱི་དུས་ལུ་ དིང་མ་བྲིན་ཟེར་མི་ གཡུས་ཚན་ཅིག་ནང་ ནད་རིམས་འདྲ་མིན་སྣ་ཚོགས་ཐོན་ཏེ་ མི་མ་ཡིན་གྱི་བུམོཅིག་ རྗེ་བཙུན་མི་ལ་རས་པ་ གདན་འདྲེན་ཞུ་བར་ བཅར་ཡོདཔ་བཞིན་དུ། རྗེ་བཙུན་མཆོག་ གཡུས་ཚན་དེ་ཁར་ བྱོན་པའི་སྐབས་ལུ་ བཀྲ་ཤིས་ཚེ་རིང་མ་ སྐུ་སྙུང་སྟེ་ཡོདཔ་ལས་ རྒྱུ་རྐྱེན་ག་ཅི་ལུ་བརྟེན་ཏེ་ སྙུང་སྙུངམ་ཨིན་ན་ཟེར་ དྲི་བ་གསུངས་པའི་ལན་ལུ།
བཀྲ་ཤིས་ཚེ་རིང་མ་གིས་ གཡུས་ཁའི་ནོཔ་རྫིཔ་ཚུ་གིས་ ཤ་དང་ པགས་ཀོ་ སྤུ་ལ་སོགས་པ་ མེར་བཏང་པའི་ དྲི་ངན་ཚུ་ ང་ལུ་ཕོགཔ་ལས། ང་གིས་ ཁོང་ཆ་ཁྱབ་ཁྱབ་ལུ་ ཆ་རོགས་འབད་མ་ཚུགས་པར་ གཡུས་ཚན་འདི་ནང་ དེ་བཟུམ་མའི་ མི་ནད་དང་ ཕྱུགས་ནད་ལ་སོགས་པ་ འདྲ་མིན་སྣ་ཚོགས་ བྱུང་སྟེ་ཡོདཔ་ལས། རྗེ་བཙུན་མཆོག་གིས་ ང་ལུ་ ཐུགས་རྗེས་གཟིགས་ཏེ་ ནད་ལས་འགྲོལ་གནང་པ་ཅིན་ ཁོང་གི་རྐྱེན་ངན་དང་ བར་ཆད་ཚུ་ བསལ་ཞིནམ་ལས་ མི་ནོར་ག་ར་ ནད་མེད་པར་ བདེ་སྐྱིད་ཀྱི་ངང་ལུ་ གནས་ཚུགས་ཟེར་ཞུ་ནུག།
དེ་ལས་ རྗེ་བཙུན་མི་ལ་རས་པ་མཆོག་གིས་ ནད་རིམས་ཚུ་ ཞི་ཐབས་ལུ་ ལྷ་བསང་ཁྲུས་གསོལ་ཚུ་ མཛད་གནངམ་ལས། བཀྲ་ཤིས་ཚེ་རིང་མ་ སྙུང་གཞི་དྭངས་པའི་ཁར་ དིང་མ་བྲིན་གྱི་ མི་སེར་ཚུ་ཡང་ དགའ་སྐྱིད་ཕུན་སུམ་ཚོགས་ཏོག་ཏོ་སྦེ་ གནས་ཚུགས་པའི་ ལོ་རྒྱུས་ཡོདཔ་ཨིན་ནོ། །
