པ་ཀིཛ་ཏཱན་གྱི་ བློན་ཆེན་བགྲེསཔ་ ཨིམ་རཱན་ཁཱན་གྱིས་ ལོ་ངོ་ ༥ གི་རིང་ལུ་ མི་མང་ཡིག་ཚང་གི་ འགན་ཁུར་འཆང་ནི་བཀག་དམ།

ཨེ་བི་སི།
སྤྱི་ཟླ་ ༡༠ པའི་ཚེས་ ༢༡ ལུ་ པ་ཀིཛ་ཏཱན་ བཙག་འཐུ་ལྷན་ཚོགས་ཀྱིས་ པ་ཀིཛ་ཏཱན་གྱི་ བློན་ཆེན་བགྲེསཔ་ ཨིམ་རཱན་ཁཱན་གྱིས་ ལོ་ངོ་ ༥ གི་རིང་ལུ་ མི་མང་ཡིག་ཚང་གི་ འགན་ཁུར་འཆང་ནི་ལས་ བཀག་དམ་འབད་ནུག།
དེ་ཡང་ ཨིམ་རཱན་ཁཱན་དེ་ བློན་ཆེན་སྦེ་ སྡོད་པའི་སྐབས་ལུ་ རྒྱལ་ཁམས་ལུ་ཐོབ་མི་ གསོལ་རས་ཚུ་ བཙོངས་ཡོདཔ་མ་ཚད་ བདོག་གཏད་ཚུ་ཡང་ སྦ་གསང་ཐོག་ལུ་ བཞག་ནུག་ཟེར་ཨིན་པས།
དེ་བཟུམ་མའི་ བཀག་དམ་ལུ་དེ་གིས་ ད་རེས་ རྒྱལ་ཁབ་ཀྱི་ དཔལ་འབྱོར་གནས་སྟངས་ མ་ལེགསཔ་ཐལ་མིའི་ནང་ སྔོན་ཆད་མ་བྱུང་པའི་ ཆུ་རུད་ཚུ་གིས་ བཟའ་འཐུང་གི་ དཀའ་ངལ་ཚུ་ཐོན་ཏེ་ མི་གྲངས་ ༡,༧༢༥ དེ་ཅིག་ལུ་ ཤི་རྐྱེན་བྱུང་པའི་ཁར་ མི་སེར་བརྒྱ་ཕྲག་ལེ་ཤ་ཅིག་ལུ་ སྡོད་ས་མེད་མི་ཚུ་དང་འབྲེལ་ཏེ་ སྲིད་དོན་གྱི་ གནོད་རྐྱེན་ཧེང་སྐལ་ར་ འབྱུང་ནི་མས་ཟེར་བཀོད་ནུག།
བློན་ཆེན་ཁཱན་དེ་ དང་ཞག་ སྤྱི་ཟླ་ ༤ པའི་ནང་ ཡིད་ཆེས་མེད་པའི་ ཚོགས་རྒྱན་བཙུགས་ཏེ་ བློན་ཆེན་གྱི་ གོ་གནས་ལས་ གནས་དབྱུང་བཏང་ཡོད་རུང་ གཞུང་སྐྱོང་གི་དོན་ལས་ རྒྱབ་སྐྱོར་པ་ཚུ་ འཚོལ་སྒྲུབ་འབད་དེ་ སྡོད་ཡོདཔ་ཨིན་པས།
ད་རེས་ བཙག་འཐུ་ལྷན་ཚོགས་ཀྱི་ གྲོས་ཆོད་ལུ་ ངོ་རྒོལ་འབད་མི་ཚུ་ གཙིགས་མོ་ལངས་ཏེ་ པ་ཀིཛ་ཏཱན་གྱི་རྒྱལ་ས་ ཨིཛ་ལ་མ་བཱད་ལུ་ཡོད་མི་ བཙག་འཐུ་ལྷན་ཚོགས་ཀྱི་ ཡིག་ཚང་ཕྱི་ཁར་ སྤུངས་འཛོམས་འབད་དེ་ཡོདཔ་ལས་ སྲུང་སྐྱོབ་དམག་མི་ཚུ་གིས་ ཡིག་ཚང་མཐའ་བསྐོར་ཏེ་ གདོང་ལེན་འབད་དགོཔ་བྱུང་ནུག།
དེ་མ་ཚད་ ཨིཛ་ལ་མ་བཱད་ལུ་ ཨིམ་རཱན་ཁཱན་གྱི་ རྒྱབ་སྐྱོར་པ་ཚུ་གིས་ འཁོར་ལོ་ཚུ་ མེར་བཏང་སྟེ་ ཁྲིམས་སྲུང་འགག་སྡེ་ལུ་ རྡོ་བཀོག་ཐོག་ལས་ ངོ་རྒོལ་འབད་སའི་ས་ཁོངས་ནང་ ཉེ་འདབས་ཀྱི་ས་གནས་ ར་ཝཱལ་པིན་ཌི་ལས་ཡང་ ངོ་རྒོལ་གྱི་ གདོང་ལེན་ལུ་ མཚོན་ཐུབ་སྣུམ་འཁོར་ཚུ་ བཏང་ནུག་ཟེར་ བཀོད་འདུག་པའི་གནས་ཚུལ།