སྤྱི་ཟླ་ ༡༢ པའི་ཚེས་ ༩ ལུ་ མི་དབང་རྒྱལ་སྲསམོ་མཆོག་གི་ མཚན་གསོལ་མཛད་གནང་ཡོདཔ་ད་ དེ་ཡང་ བསོད་ནམས་གཡང་སྒྲོན་དབང་ཕྱུག་ཟེར་ གསོལ་གནང་ནུག།
འབྲུག་པའི་མཚན་ བསོད་ནམས་ཟེར་མི་འདི་ དགེ་ཚོགས་དང་ སྐུ་ཚེ་བསྲིང་ནི་ ཁ་རྗེ་བཟང་པོའི་དོན་དང་ གཡང་སྒྲོན་ཟེར་མི་འདི་ རིན་ཆེན་ནོར་བུ་ལུ་གོཝ་ལས་ མཚན་བཟང་དེ་གིས་ ལོངས་སྤྱོད་དང་ བདེ་ཉམས་ཀྱི་ བརྡ་མཚོན་སྟོནམ་ཨིན་པས།
མཚན་གསོལ་དེ་ཡང་ སྤྱི་ལོ་ ༢༠༠༦ ལུ་ མི་དབང་མངའ་བདག་རིན་པོ་ཆེ་མཆོག་ གསེར་ཁྲིར་མངའ་གསོལ་ཞུ་བའི་ དུས་སྟོན་གྱི་ཉིན་མར་ བཀྲིས་ཆོས་རྫོང་ནང་ བརྩི་སྲུང་མཛད་ཡོདཔ་ད་ མཚན་གསོལ་རྟེན་འབྲེལ་ནང་ སྐྱབས་རྗེ་རྗེ་མཁན་མཆོག་དང་ མི་དབང་འབྲུག་རྒྱལ་བཞི་པ་མཆོག་ དབུ་བཞུགས་ཐོག་ལུ་ མི་དབང་རྒྱལ་ཡུམ་ལྷན་རྒྱས་དང་ མི་དབང་སྐུ་འཁོར་ཚུ་གིས་ གྲལ་གཏོགས་མཛད་གནང་ནུག།
མཚན་གསོལ་རྟེན་འབྲེལ་གྱི་ མཛད་སྒོའི་སྐབས་ལུ་ གྲྭ་ཚང་གི་ སྐུ་ཚབ་ཚུ་གིས་ སྐུ་གསུམ་མཎྜལ་དང་ འབྲུག་གི་འབངས་མི་སེར་ཚུ་གི་ ངོ་ཚབ་ལུ་ རྫོང་ཁག་ཉི་ཤུའི་ རྫོང་བདག་དང་ ཁྲི་འཛིན་ བླམ་གནས་བརྟན་ཚུ་གིས་ འབུལ་བ་ཚུ་ཡང་ ཕུལ་ཡོདཔ་ཨིན་པས།
མི་དབང་རྒྱལ་སྲསམོ་མཆོག་ མི་དབང་མངའ་བདག་རིན་པོ་ཆེ་དང་ མི་དབང་རྒྱལ་བཙུན་མཆོག་གི་ སྲས་སྲོས་གསུམ་པ་སྦེ་ དུས་ཅི་ སྤྱི་ཟླ་ ༩ པའི་ཚེས་ ༩ ལུ་ སྐུ་འཁྲུངས་ཡོད་པའི་གནས་ཚུལ།
ཐིམ་ཕུ་བཀྲ་ཤིས་ཆོས་རྫོང་ནང་ མི་དབང་རྒྱལ་སྲསམོ་མཆོག་གི་ མཚན་གསོལ་རྟེན་འབྲེལ།
Comments are closed.
Related
མི་དབང་མངའ་ཞབས་མཆོག་གིས་ འཛམ་གླིང་སྤྱི་ཚོགས་ཀྱི་ ཞི་བདེ་ཉེན་སྲུང་སྡེ་ཚན་དང་གཅིག་ཁར་ མཇལ་ཕྲད་མཛད་གནང་ཡོདཔ།
པདྨ་དབང་འདུས། སྤྱི་ཟླ་ ༡༠ པའི་ཚེས་ ༧ ལུ་ མི་དབང་མངའ་བདག་རིན་པོ་ཆེ་མཆོག་གིས་ སྤ་རོ་ལུ་སྦེ་ འཛམ་གླིང་སྤྱི་ཚོགས་ཀྱི་ ཞི་བདེ་ཉེན་སྲུང་སྡེ་ཚན་དང་གཅིག་ཁར་ མཇལ་ཕྲད་མཛད་གནང་ཡོདཔ་ད་ སྡེ་ཚན་དེ་གིས་ མགྱོགས་པ་ར་ སེན་ཊྲཱལ་ཨཕ་རི་ཀཱན་ རི་པབ་ལིག་ནང་ ཞི་བདེའི་ལཱ་ཚུ་འབད་ནི་ཨིན་པས། འཐུས་མི་ ༡༨༠ འབད་མི་ སྡེ་ཚན་དེ་ནང་ ཨམ་སྲུ་ ༡༣ ཡོདཔ་ད་ སྡེ་ཚན་དེ་ཡང་ ནང་གསེས་སྡེ་ཚན་ཁག་ ༢ ལས་ སྡེ་ཚན་དང་པ་དེ་ སྤྱི་ཟླ་ ༡༠ པའི་ཚེས་ ༨ ལུ་ འཕུར་འགྲུལ་འབད་ཡོདཔ་ད་ སྡེ་ཚན་ ༢ པ་དེ་ སྤྱི་ཟླ་ ༡༠ པའི་ཚེས་ ༡༩ ལུ་ འཕུར་འགྲུལ་འབད་ནི་ཨིན་པས། འབྲུག་གིས་ འཛམ་གླིང་སྤྱི་ཚོགས་ཀྱི་ ཞི་བདེ་ཉེན་སྲུང་ནང་ སྤྱི་ལོ་ ༢༠༡༤ ལས་ཚུར་ གྲལ་གཏོགས་འབད་དེ་ཡོདཔ་ད་ སྡེ་ཚན་དེ་ནང་ དམག་མིའི་འགོ་དཔོན་དང་ ལས་བྱེདཔ་ དེ་ལས་ ཁྲིམས་སྲུང་འགག་སྡེའི་ […]
འཇིགས་མེད་རྡོ་རྗེ་དབང་ཕྱུག་ རྒྱལ་ཡོངས་གཙོ་བསྟེན་སྨན་ཁང་ནང་ ཨོམ་གྱི་སྨན་བཅོས་ཁང་གི་ ལོ་འཁོར་དུས་སྟོན་དང་པ་བརྩི་སྲུང་།
སྤྱི་ཟླ་ ༩ པའི་ཚེས་ ༡༣ ལུ་ རྒྱལ་ཡུམ་དགེ་དོན་བློ་གཏད་ཀྱི་སྐྱབས་འཛིན་ མི་དབང་རྒྱལ་ཡུམ་ སངས་རྒྱས་ཆོས་སྒྲོན་དབང་ཕྱུག་མཆོག་གིས་ ཐིམ་ཕུ་འཇིགས་མེད་རྡོ་རྗེ་དབང་ཕྱུག་ རྒྱལ་ཡོངས་གཙོ་བསྟེན་སྨན་ཁང་ནང་ རྒྱལ་བཙུན་རྗེ་བཙུན་པདྨ་སྐྱེས་མ་དང་ ཨ་ལོའི་སྨན་ཁང་ནང་ འབྲུག་གི་ཨོམ་གྱི་སྣ་མང་སྨན་བཅོས་ཁང་དང་པའི་ ལོ་འཁོར་དུས་སྟོན་ཐེངས་དང་པ་ བརྩི་སྲུང་ཞུ་སར་ དབུ་བཞུགས་མཛད་གནང་ནུག། དུས་སྟོན་དེ་ཁར་ གཞན་ཡང་ མཐའ་ཡས་ལེན་གྱི་ རྒྱལ་ཡུམ་སི་རི་ཀིཏ་ ཨོམ་གྱི་ཀེན་སར་གཞི་ཚོགས་ཀྱི་ ཆེད་བསྟོད་མདོ་ཆེན་ ལེགས་སྦྱར་བ་ཌོག་ཊར་ཀི་རིཤ་ན་ཅ་ཏམ་ར་དང་ གསོ་བའི་སྐྱོང་བཞག་གི་ ཁྱད་ལཱ་འབད་མི་དང་ ཆེ་མཐོའི་སྐུ་མགྲོན་ཚུ་གིས་ཡང་ གྲལ་གཏོགས་འབད་ཡོདཔ་ཨིན་པས། ཨོམ་གྱི་སྨན་བཅོས་ཁང་དེ་ གསོ་བ་ལྷན་ཁག་དང་ འཇིགས་མེད་རྡོ་རྗེ་དབང་ཕྱུག་ རྒྱལ་ཡོངས་གཙོ་བསྟེན་སྨན་ཁང་ དེ་ལས་ རྒྱལ་ཡུམ་དགེ་དོན་བློ་གཏད་དང་ རྒྱལ་ཡུམ་སི་རི་ཀིཏ་ ཨོམ་གྱི་ཀེན་སར་གཞི་ཚོགས་བཅས་ཀྱི་ མཉམ་འབྲེལ་ལས་སྣ་ཅིག་ཨིནམ་ད་ སྨན་བཅོས་ཁང་དེ་ གཞི་བཙུགས་དང་ གོང་ཕེལ་ལུ་ ལེགས་སྦྱར་བ་ ཌོག་ཊར་ཀི་རིཤ་ན་ཅ་ཏམ་ར་གིས་ གཏོང་ཕོད་ཅན་གྱི་ ཞལ་འདེབས་དང་ ཁས་ལེན་ སློབ་སྟོན་ཚུ་གི་སྒོ་ལས་ རྒྱབ་སྐྱོར་འབད་ཡོདཔ་མ་ཚད་ ཁོ་གིས་ འབྲུག་དང་གཅིག་ཁར་ འཕྲོ་མཐུད་དེ་ར་ མཉམ་འབྲེལ་འབད་དེ་ ཨོམ་གྱི་སྐྱོང་བཞག་ནང་ དམིགས་བསལ་གྱི་ བཙན་ཐབས་དང་ ས་གནས་ཀྱི་ལྕོགས་གྲུབ་ […]
དེང་དུས་ཀྱི་རིག་རྩལཔ་ པདྨ་ལྷམོ་ལུ་ རུ་བིན་མིའུ་ཛི་ཡམ་ ཧི་མ་ལ་ཡའི་ རིག་རྩལ་གསོལ་རས།
མི་དབང་རྒྱལ་བཙུན་མཆོག་གིས་ སྤྱི་ཟླ་ ༩ པའི་ཚེས་ ༡༡ ལུ་ འབྲུག་གི་ཁས་བླངས་རིག་རྩལ་ཁང་ནང་ གསོལ་རས་ཀྱི་ རྟེན་འབྲེལ་ཅིག་ བརྩི་ཐོག་ལས་ སྤྱི་ལོ་ ༢༠༢༦ ལོའི་ རུ་བིན་མིའུ་ཛི་ཡམ་ ཧི་མ་ལ་ཡའི་ རིག་རྩལ་གསོལ་རས་དེ་ དེང་དུས་ཀྱི་རིག་རྩལཔ་ པདྨ་ལྷམོ་ལུ་ གནང་ཡོདཔ་ཨིན་པས། རུ་བིན་མིའུ་ཛི་ཡམ་ ཧི་མ་ལ་ཡའི་ རིག་རྩལ་གསོལ་རས་དེ་ ཧི་མ་ལ་ཡའི་ ལམ་སྲོལ་གྱི་ བཟོ་རྣམ་དང་ ཐབས་རིག་ཚུ་གི་ སེམས་སྐུལ་ཐོག་ལུ་ ཐོན་རིམ་ཅན་གྱི་ དེང་དུས་ཀྱི་རིག་རྩལཔ་ཚུ་ལུ་ གནང་སྲོལ་ཡོདཔ་སྦེ་བཀོད་ནུག། དེ་ཡང་ སྤྱི་ལོ་ ༢༠༢༤ ལུ་ གཞི་བཙུགས་འབད་མི་ རུ་བིན་མིའུ་ཛི་ཡམ་ ཧི་མ་ལ་ཡའི་ རིག་རྩལ་གསོལ་རས་དེ་ ཌོ་ལར་ ༣༠,༠༠༠ རེ་ ཐོབ་དོ་ཡོདཔ་ད་ འདས་དང་མ་འོངས་གཉིས་ཆ་རའི་ནང་ རིག་རྩལ་གྱི་ ཁེ་ཕན་ཡོད་པའི་ རིག་རྩལཔ་དྲག་ཤོས་ཚུ་ རྒྱལ་སྤྱིའི་དྲང་དཔོན་ཚུ་དང་ རུ་བིན་མིའུ་ཛི་ཡམ་གྱི་ ལས་གཡོགཔ་ཚུ་གིས་ གདམ་ཁ་རྐྱབ་དོ་ཡོདཔ་ཨིན་པས།