ཊེག་སཱཛ་གི་ས་གནས་ སཱན་ཨེན་ཊོ་ནི་ཡོ་ལུ་ གློ་བུར་དུ་ ཆུ་རུད་ཐོན་པའི་ རྐྱེན་ངན་ནང་ མི་གྲངས་ ༡༡ ལུ་ཤི་རྐྱེན།

བི་བི་སི།
ཊེག་སཱཛ་གི་ས་གནས་ སཱན་ཨེན་ཊོ་ནི་ཡོ་ལུ་ གློ་བུར་གྱི་ ཆུ་རུད་ཐོནམ་ལས་ མི་གྲངས་ ༡༡ ལུ་ ཤི་རྐྱེན་བྱུང་ཡོདཔ་མ་ཚད་ ལེ་ཤ་ཅིག་ཡང་ འཚོལ་མ་ཐོབ་པར་ཡོདཔ་ཨིན་པས།
དེ་ཡང་ སྤྱི་ཟླ་ ༦ པའི་ཚེས་ ༡༡ དང་ ༡༢ ལུ་ ཆར་རླུང་ཚབས་ཆེན་བྱུང་ཡོདཔ་ལས་ འཁོར་ལམ་བདའ་སྟེ་ སྣུམ་འཁོར་ཚུ་ འགྲོ་འགྲུལ་འབད་མ་ཚུགས་པར་ ལུས་ཡོདཔ་སྦེ་བཀོད་ནུག།
སཱན་ཨེན་ཊོ་ནི་ཡོའི་ མེ་རྐྱེན་སྲུང་སྐྱོབ་ལས་ཁུངས་ཀྱིས་ བཤད་དོ་བཟུམ་འབད་བ་ཅིན་ ཆུ་རུད་དེ་ནང་ བྱང་སྟོར་ཤོར་མི་ ༤ འཚོལ་བའི་བསྒང་ཡོད་ཟེར་ཨིནམ་ད་ སྲོག་སྐྱབས་ཀྱི་ ལཱ་ཚུ་གི་དོན་ལས་ ཉིནམ་དག་པ་ཅིག་ར་ འགོར་ནི་བཟུམ་ཅིག་ཡོདཔ་ལས་ ཤི་རྐྱེན་གྱི་ གྱངས་ཁ་དེ་ ཡར་སེང་འགྱོ་སྲིད་ནི་མས་ཟེར་ཨིན་པས།
དེ་འབདཝ་ལས་ འཚོལ་ཞིབ་དང་ སྲོག་སྐྱབས་ཀྱི་ ལཱ་འབད་མི་ཚུ་གིས་གཙོས་པའི་ གྲོགས་རམ་ཁ་སྐོང་ དགོས་མཁོ་ཡོདཔ་སྦེ་བཀོད་ནུག།
ཊེག་སཱཛ་ཁྲོམ་སྡེའི་ ཡོངས་འབྲེལ་འཆར་སྒོའི་ནང་ བཀོད་དོ་བཟུམ་འབད་བ་ཅིན་ སྤྱི་ཟླ་ ༦ པའི་ཚེས་ ༡༣ ཚུན་གྱི་རིང་ལུ་ ཆུ་ནང་ལས་ སྲོག་སྐྱབས་ལན་ཐེངས་ ༧༠ དེ་ཅིག་ འགོ་འདྲེན་འཐབ་ཡོདཔ་ད་ རྨ་སྐྱོན་བྱུང་མི་ཚུ་ སྨན་ཁང་ནང་ བསྐྱལ་ཡོདཔ་སྦེ་ཨིན་པས།
རྐྱེན་ངན་དེ་ནང་ ཤི་རྐྱེན་བྱུང་མི་ཚུ་གི་གྲས་ལས་ མི་ངོམ་ ༣ འབད་མི་ཅིག་ ངོས་འཛིན་འབད་ཚུགས་ཡོདཔ་ད་ འགོ་དཔོན་ཚུ་གིས་ ངོས་འཛིན་འབད་ཚུགས་མི་ཚུ་ དྲོ་པའི་ཆུ་ཚོད་ ༥ དེ་ཅིག་ལས་ ལམ་མ་ཐལ་བར་ སྣུམ་འཁོར་ནང་ར་ སྡོད་ཡོདཔ་ལས་ ཆུ་རུད་ལུ་བརྟེན་ཏེ་ སྣུམ་འཁོར་ནང་ ཆུ་འཁྱིལ་ཏེ་ ཤི་རྐྱེན་བྱུང་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།