རོའི་ཊརཛ།
སྤྱི་ཟླ་ ༡༡ པའི་ཚེས་ ༡༢ ལུ་ ར་ཤི་ཡའི་ དམག་སྡེ་གིས་ ཡུ་ཀེ་རེན་དམག་སྡེའི་ བཟོ་གྲྭ་འཕྲུལ་ཁང་ཚུ་ནང་ ནུབམོ་གཅིག་གི་རིང་ལུ་ གནོད་འཚུབ་བཀལ་ཡོདཔ་མ་ཚད་ མཁའ་དམག་འཕྲུལ་ཆས་ ཌྲཱོན་གྱི་ཐོག་ལས་ཡང་ ཁང་ཚན་ཅན་གྱི་ སྒྲིང་ཁྱིམ་ཅིག་ལུ་ གནོད་འཚུབ་བཀལ་ནུག།
ཀི་ཡིབ་ཁྲོམ་དཔོན་ ཝི་ཊ་ལི་ ཀི་ལིཆ་ཀོ་གིས་ བཤད་དོ་བཟུམ་འབད་བ་ཅིན་ ར་ཤི་ཡའི་ མཁའ་དམག་འཕྲུལ་ཆས་ ཌྲཱོན་གྱི་ཐོག་ལས་ སོ་ལོ་མ་ཡཱནཛ་ཀི་ རྫོང་ཁག་ཁྲོམ་སྡེའི་ནང་ ཐོག་ཚད་ ༩ འབད་མི་ སྒྲིང་ཁྱིམ་ཅིག་ལུ་ གནོད་འཚུབ་བཀལ་ཡོདཔ་ལས་ ཨམ་སྲུ་ ༡ ལུ་ ཤི་རྐྱེན་དང་ གཞན་མི་ ༥ དེ་ཅིག་ལུ་ རྨ་སྐྱོན་བྱུང་ནུག་ཟེར་ཨིན་པས།
དེ་མ་ཚད་ ཀི་ཡིབ་ལུ་ཡོད་མི་ རོ་ཀེཊ་བཟོ་གྲྭ་འཕྲུལ་ཁང་ ༡ དང་ ཀི་ཡིབ་ལུང་ཕྱོགས་ནང་ཡོད་མི་ མཁའ་དམག་འཕྲུལ་ཆས་ ཌྲཱོན་སྒྲིག་བཅོས་ཁང་ དེ་ལས་ མི་ཛ་ཡེལ་གྱི་ མར་ཁུ་འཕྲུལ་ཁང་དང་ གློག་མེ་བཀྲམ་སྤེལ་ཡན་ལག་ཚུ་ལུ་ཡང་ གནོད་འཚུབ་བཀལ་ནུག།
དེ་བཟུམ་སྦེ་ ར་ཤི་ཡ་གིས་ ནུབ་བྱང་རི་ཝ་ནི་ལུང་ཕྱོགས་ནང་ ནུས་ཤུགས་དང་ ཞི་བའི་གཞི་རྟེན་མཐུན་རྐྱེན་ཚུ་ལུ་ཡང་ གནོད་འཚུབ་བཀལ་ཡོདཔ་སྦེ་ ཡུ་ཀེ་རེན་གྱི་ ས་གནས་འགོ་དཔོན་ཅིག་གིས་ བཤད་ཡོདཔ་ཨིན་པས།
དེ་ལས་ ཡུ་ཀེ་རེན་གྱི་ མཁའ་དམག་འཕྲུལ་ཆས་ ཌྲཱོན་གྱི་ཐོ་ལས་ ར་ཤི་ཡའི་རྒྱལ་ས་ མོཛ་ཀོ་ལུ་ གནོད་འཚུབ་བཀལ་བའི་སྐབས་ལུ་ མཁའ་དམག་འཕྲུལ་ཆས་ཌྲཱོན་ ༥ ཕབ་བཏང་ཡོདཔ་སྦེ་ མོཛ་ཀོའི་ཁྲོམ་དཔོན་ སེར་གི་སོ་བི་ཡ་ནིན་གྱིས་ གསལ་བཤད་འབད་ནུག།
ད་རུང་ ནུབམོ་གཅིག་གི་རིང་ལུ་ ར་ཤི་ཡའི་ རྒྱལ་ཁབ་ནང་འཁོད་ལུ་ གནོད་འཚུབ་བཀལ་མི་ ཡུ་ཀེ་རེན་གྱི་ མཁའ་དམག་འཕྲུལ་ཆས་ ཌྲཱོན་ ༧༡ དེ་ཅིག་ཡང་ ཕབ་བཏང་ཡོདཔ་སྦེ་ ར་ཤི་ཡའི་ སྲུང་སྐྱོབ་ལྷན་ཁག་ལས་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།
Leave a Reply