རོའི་ཊརཛ།
སྤྱི་ཟླ་ ༡༡ པའི་ཚེས་ ༡༠ ལུ་ བཱལ་ག་རི་ཡའི་ ཤར་ལྷོ་ཁ་ཐུག་གི་ གཞུང་ལམ་བདའ་སྟེ་ ས་སྨུག་སྤུར་ཏེ་ཡོདཔ་ལས་ འགྲུལ་སྐྱོད་འབད་མི་ སྣུམ་འཁོར་ལེ་ཤ་ཅིག་ལུ་ ཐུག་རྐྱེན་བྱུང་ཡོདཔ་ལས་ མི་གྲངས་ ༡༡ དེ་ཅིག་ལུ་ ཤི་རྐྱེན་བྱུང་ནུག།
དེ་ཡང་ གཞུང་ལམ་གཡས་གཡོན་གཉིས་ཆ་རའི་ནང་ སྣུམ་འཁོར་ཀར་དང་ ཊག་དེ་ཚུ་གི་ ཡན་ལག་ཚུ་ ཕྱལ་སོང་སྟེ་ གཅིག་གིས་གཅིག་གུ་ བརྩེགས་ཏེ་ཡོདཔ་ད་ ཁྲིམས་སྲུང་འགག་སྡེ་དང་ མེ་བསད་སྡེ་ཚན་ ནདཔ་སྐྱེལ་འདྲེན་འབད་མི་ སྣུ་འཁོར་གྱི་ ལས་བྱེདཔ་ཚུ་ ཉེན་སྐྱོབ་འབད་བར་ ལྷོད་ཡོདཔ་ཨིན་པས།
ནང་སྲིད་ལྷན་ཁག་འོག་གི་ ཡམ་བོལ་ལུང་ཕྱོགས་ཡིག་ཚང་ལས་ ཞིབ་དཔྱད་འགོ་དཔོན་ ཊོ་ཌོར་མི་ཤི་ནེབ་ཀྱིས་ མི་ལ་ལུ་ཅིག་ ད་ལྟོ་ཡང་ སྣུམ་འཁོར་ནང་ར་ཡོདཔ་སྦེ་ གསལ་བཤད་འབད་ནུག།
ཐུག་རྐྱེན་དེ་ནང་ རྨ་སྐྱོན་བྱུང་མི་ ནདཔ་ ༢༧ དེ་ཅིག་ ལུང་ཕྱོགས་སྨན་ཁང་ཚུ་ནང་ སྨན་བཅོས་འབད་བར་ བསྐྱལ་ཡོདཔ་སྦེ་ཡང་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།
Leave a Reply