དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ བྱང་ཆུབ་མཆོད་རྟེན་ ༡༠༨ ཉིནམ་གཅིག་ལུ་ གསར་བཞེངས་མཛད་གནང་ཡོདཔ།

དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ སྤྱི་ཟླ་ ༡༡ པའི་ཚེས་ ༡ ལུ་ བྱང་ཆུབ་མཆོད་རྟེན་ ༡༠༨ གསར་བཞེངས་གནང་སར་ མི་གྲངས་འབུམ་ ༢ ལྷགཔ་ཅིག་ འཛོམས་ཡོདཔ་ཨིན་པས།
བྱང་ཆུབ་མཆོད་རྟེན་ ༡༠༨ དེ་ ས་གོ་གཅིག་ནང་ སྔོན་ཆད་བྱུང་མ་མྱོང་པའི་ ཚད་གཞི་ཁར་ སྤུངས་འཛོམས་འབད་མི་ མི་སེར་ཚུ་གི་གདོང་ཁར་ དུས་ཡུན་ཆུ་ཚོད་ ༩ མ་ལངམ་ཅིག་གི་ ནང་འཁོད་ལུ་ བཞེངས་ཚར་ནུག།
དེ་ཡང་ ཁས་བླངས་པ་དང་ འགོ་འདྲེན་འཐབ་མི་ ༩,༥༠༠ ལྷགཔ་ཅིག་ མཉམ་བསྡོམས་ཀྱི་ བརྩོན་ཤུགས་ལུ་བརྟེན་ཏེ་ དེ་བཟུམ་མའི་ གྲུབ་འབྲས་བཏོན་ཚུགས་ཡོདཔ་ད་ མཆོད་རྟེན་དེ་ཚུ་ བཞེངས་ནིའི་དོན་ལུ་ གྲ་སྒྲིག་འབད་ནི་དང་ ས་གོ་ནང་གི་ལཱ་ དེ་ལས་ གཟིགས་རོལ་ཚུ་ ཟླཝ་དགུ་མ་ལངམ་ཅིག་གི་ དུས་ཡུན་ནང་བསྒྲུབས་ཡོདཔ་ཨིན་པས།
གཞུང་གྲྭ་ཚང་གི་ ཁ་ཐུག་ལས་ མཆོད་རྟེན་རེ་རེ་བཞིན་གྱི་ ནང་རྟེན་ཚུ་ ཟླཝ་ལེ་ཤ་གི་བར་ན་ གྲ་སྒྲིག་གནང་ཡོདཔ་ད་ གཞན་ཡང་ སྡེ་ཚན་ལེ་ཤ་ཅིག་གིས་ ཕྱགས་སྙིགས་དང་ སྐྱེལ་འདྲེན་ མགྲོན་སྐྱོང་གི་ ཞབས་ཏོག་ཚུ་གིས་མ་དོ་བར་ གྲོགས་རམ་གྱི་ འབྲེལ་སྟེགས་དང་ ནདཔ་སྐྱེལ་འདྲེན་སྣུམ་འཁོར་ སྨན་སྤྲོད་ཁང་ མི་མང་གི་གསང་སྤྱོད་ འཐུང་ཆུ་ གློག་མེ་ ཡོངས་འབྲེལ་ཚུ་ རྒྱུན་མ་ཆད་པར་ རྒྱུན་སྐྱོང་འཐབ་ནི་གི་ ལཱ་ཚུ་འབད་ནུག།
སྤྱི་ཟླ་ ༡༡ པའི་ཚེས་ ༡ ལུ་ ཁས་བླངས་པ་ཚུ་གིས་ ས་གནས་དེ་ཁར་ འཛོམས་མི་ཚུ་ལུ་ མཆོད་རྟེན་གྱི་ ས་གོ་ནང་འཁོད་དང་ དུས་སྟོན་གཞན་ཚུ་ འགོ་འདྲེན་འཐབ་སར་ ལམ་སྟོན་དང་ ཞབས་ཏོག་ཚུ་ཡང་ སྤྲོད་ཡོདཔ་མ་ཚད་ དེ་ཚེ་གི་ བྱ་སྒོའི་རིམ་པ་ཚུ་ཡང་ དངོས་མཐོང་སྦེ་ རྒྱང་བསྒྲགས་འབད་དེ་ ས་གནས་ག་ཏེ་ལས་ཡང་ མི་མང་འབུམ་ཕྲག་ལས་བཅད་མི་ཚུ་གིས་ འབྱུང་རབས་ཅན་གྱི་ དུས་སྟོན་དེ་ནང་ གྲལ་གཏོགས་འབད་ཚུགས་ཡོདཔ་ཨིན་པས།
མི་དབང་མངའ་རིན་པོ་ཆེའི་ཞབས་ལས་ ལས་སྡེ་དང་ སྡེ་ཚན་ཚུ་གི་ མིང་བཏོན་གནང་ནི་དང་གཅིག་ཁར་ ཁས་བླངས་པ་དང་ འགོ་འདྲེན་པ་ཡོངས་ལུ་ འབྲུག་གི་ དམིགས་བསལ་གྱི་ དུས་ཚོད་དེ་གི་དོན་ལུ་ མཉམ་བསྡོམས་བརྩོན་ཤུགས་ཐོག་ལས་ ཕྱག་ཕྱིད་ཞུ་མི་ལུ་ བཀྲིན་དགའ་ཚོར་ཡོད་ལུགས་ གསུངས་གནང་ཡཔའི་ཁར་ སྨོན་ལམ་གྱི་ཐང་ནང་སྦེ་ ལྟོ་ཁ་ཅིག་ཡང་ གནང་ཡོད་པའི་གནས་ཚུལ།