སྐྱབས་རྗེ་རྒྱལ་དབང་ཀརྨ་པ་མཆོག་གིས་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ བྱིན་ལྡན་མཆོད་རྟེན་གྱི་ ས་བསླང་རྟེན་འབྲེལ།

པདྨ་དབང་འདུས།
སྐྱབས་རྗེ་རྒྱལ་དབང་ཀརྨ་པ་ སྐུ་འཕྲེང་ ༡༧ པ་ ཨྱོན་ཕྲིན་ལས་རྡོ་རྗེ་མཆོག་གིས་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ འཇམ་དཔལ་རྒྱས་པའི་མདངས་ལྡན་ཟེར་མི་ བྱིན་ལྡན་མཆོད་རྟེན་གྱི་ ས་བསླང་རྟེན་འབྲེལ་ནང་ དབུ་བཞུགས་མཛད་གནང་ཡོདཔ་ད་ དེ་བསྒང་ མཆོད་རྟེན་དེ་གི་ སྐྱབས་འཛིན་པ་ མི་དབང་རྒྱལ་བཙུན་མཆོག་གིས་ཡང་ གྲལ་བཞུགས་མཛད་གནང་ནུག།
དེ་ཡང་ སྐྱབས་རྗེ་རྗེ་མཁན་རིན་པོ་ཆེ་མཆོག་གི་ ཕྱག་འགན་ཐོག་ལུ་ བཞེངས་གནང་ནི་ཨིན་མི་ མཆོད་རྟེན་དེ་ ཤེས་རབ་ཀྱི་ལྷ་ཆེན་ རྗེ་བཙུན་འཇམ་དཔལ་དབྱངས་ལུ་ ཆེད་དུ་བསྔོ་གནང་ཡོདཔ་ད་ མཆོད་རྟེན་གྱི་ མཚན་བྱང་དེ་གིས་ ཤེས་རབ་ཀྱི་ལྷ་ དགྱེས་མཛུམ་གྱི་སྒོ་ལས་ མཆོད་རྟེན་དེ་ མཇལ་བར་འོང་མི་དང་ སྐོར་ར་རྐྱབ་མི་ ཡང་ཅིན་ མཇལ་བ་ཙམ་གྱིས་ ཞི་བདེ་དང་ བྱིན་རླབས་སྩལ་བའི་ རྗེ་བཙུན་འཇམ་དཔལ་དབྱངས་ དགྱེས་མཛུམ་གྱི་ བརྡ་མཚོན་སྟོནམ་ཨིན་པས།
མཆོད་རྟེན་དེ་ཡང་ དུས་རབས་ལེ་ཤ་ཅིག་གི་རིང་ལུ་ ཀརྨ་བཀའ་བརྒྱུད་ཀྱི་ ཆོས་ལུགས་དང་ གངས་རི་འུ་ཏའི་ཟེར་ རྒྱ་ནག་ལུ་ཡོད་པའི་ འཇམ་དཔལ་དབྱངས་ཀྱི་གདན་ས་དང་ འབྲེལ་བ་ཡོད་མི་ལུ་ གུས་བཏུད་ཞུཝ་ཨིནམ་ད་ འབྲེལ་བ་དེ་ཡང་ སྤྱི་ལོ་ ༡༤༠༨ ལུ་ རྒྱལ་དབང་ཀརྨ་པ་ སྐུ་འཕྲེང་ལྔ་པ་མཆོག་གིས་ གངས་རི་འུ་ཏའི་ལུ་ གནས་སྐོར་ལུ་ བྱོན་ཡོད་པའི་དུས་ལས་ཚུར་བྱུང་ནུག།
འཇམ་དཔལ་དགྱེས་པའི་ མཆོད་རྟེན་དེ་ མི་དབང་མངའ་བདག་རྒྱལ་པོའི་ བཀའ་ཤོག་ཐོག་ལས་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ ཆོས་འབྲེལ་ལས་འགུལ་ ༢༢ འགོ་བཙུགས་དགོཔ་སྦེ་ཡོད་མིའི་གྲངས་སུ་ ཚུདཔ་ཨིན་པས།
ནང་པ་སངས་རྒྱས་པའི་ ཆོས་ལུགས་མ་འདྲཝ་ཚུ་གི་ བླ་སློབ་དམ་པ་ཚུ་གིས་ ཕྱག་འགན་བཞེས་པའི་ ལྷ་ཁང་དང་ མཆོད་རྟེན་ ནང་པའི་ཆོས་ཀྱི་ལྟེ་བ་ཚུ་གིས་ དགེ་ལེགས་ཕུག་ དྲན་ཤེས་ཁྲོམ་ཚོགས་དེ་ མི་དབང་མངའ་བདག་རིན་པོ་ཆེ་མཆོག་གི་ ཐུགས་ཀྱི་དགོངས་འཆར་དང་བསྟུན་ཏེ་ གསང་སྔགས་རྡོ་རྗེ་ཐེག་པ་དང་ ནང་པའི་ཆོས་དོན་གྱི་ ཁྲོམ་ཚོགས་སྦེ་ བཟོ་བསྐྲུན་འབད་ནི་ལུ་ ཁེ་ཕན་འབྱུང་ནི་ཨིན་པའི་གནས་ཚུལ།